హలీమ్‌ | Haleem | Mohanpublications | Granthanidhi | Bhaktipustakalu

హలీమ్‌

రంజాన్‌ అంటే హలీమ్‌... సాయంత్రం ఏడు దాటితే చాలు చౌరస్తాల్లో హలీమ్‌ ఘుమఘుమలు గుబాళిస్తుంటాయి. ఆ దారంట వెళ్లే వారందరి చవులూరిస్తుంటాయి. తెలియకుండానే అందరి దారి అటు మళ్లుతుంది. ఈ నెలంతా హలీమ్‌ను ఆస్వాదిస్తూ పరవశించిపోయే చిన్నా పెద్దా గుంపులు గుంపులుగా కనిపిస్తారు. మటన్‌ హలీమ్‌, చికెన్‌ హలీమ్‌, ఫిష్‌ హలీమ్‌.. ఇలా రకరకాల నాన్‌వెజ్‌ హలీమ్‌లతోపాటు వెరైటీ వెజ్‌ హలీమ్‌లను సైతం ఫుడీస్‌ ఎంజాయ్‌ చేస్తున్నారు. మీకోసం ఈ వారం కొన్ని హలీమ్‌మ్‌మ్‌లు...

చికెన్‌ హలీమ్‌

కావలసినవి: చికెన్‌- 750 గ్రాములు, అల్లం-వెల్లుల్లి పేస్టు-ఒక టేబుల్‌స్పూను, ఉల్లిపాయలు-అర కప్పు (సన్నగా తరిగి), గులాబీ రెక్కలు-పావు కప్పు, పచ్చిమిర్చి-ఐదు, నెయ్యి-అరకప్పు, గోధుమరవ్వ-అర కప్పు, ఓట్స్‌-పావు కప్పు, బాదంపప్పులు-ఆరు, శెనగపప్పు, పెసరపప్పు, ఎర్రకందిపప్పు, మినపప్పు-ఒక్కొక్కటీ ఒక్కో స్పూను, నువ్వులు-మూడు గ్రాములు, జీలకర్ర-నాలుగు గ్రాములు, లవంగాలు-రెండు గ్రాములు, మిరియాలు-మూడు గ్రాములు, దాల్చినచెక్క-రెండు అంగుళాల ముక్క, యాలకులు-ఎనిమిది, సాజీరా- రెండు గ్రాములు, కబాబ్‌చినీ-రెండు గ్రాములు, పాలు-ఒక కప్పు, ఉప్పు- రుచికి సరిపడా, వేగించిన ఉల్లిపాయముక్కలు-అర కప్పు, పెరుగు-రెండు టేబుల్‌స్పూన్లు (ఛాయిస్‌), కొత్తిమీర-అరకట్ట (తరుగు), పుదీనా-అర కట్ట (తరుగు).

తయారీ:

• వెడల్పాటి గిన్నెలో కబాబ్‌ చినీ, సాజీరా, యాలకులు, దాల్చినచెక్క, మిరియాలు, జీలకర్ర, పెసరపప్పు, మినపప్పు, శెనగపప్పు, ఎర్ర కందిపప్పు, బాదం, ఓట్స్‌, గోధుమరవ్వ అన్నింటినీ కలిపి ఆ మిశ్రమాన్ని బ్లెండర్‌లో వేసి మెత్తగా పొడిచేయాలి.
• ప్రెషర్‌ కుక్కర్‌లో నెయ్యి వేసి వేడెక్కాక అల్లంవెల్లుల్లి పేస్టు వేసి వేగించాలి. చికెన్‌ ముక్కలతో పాటు చికెన్‌ను నానబెట్టిన నీళ్లను కూడా అందులో పోసి కలపాలి. ఈ మిశ్రమంలో వేగించిన ఉల్లిపాయముక్కలు, గులాబిరెక్కలు, పెరుగు, పచ్చిమిర్చి, కొత్తిమీర, పుదీనా తరుగు, ఉప్పు, రెడీచేసి పెట్టుకున్న పొడిని వేసి బాగా కలపాలి. పెద్దమంటపై రెండు విజిల్స్‌ వచ్చేదాకా ఈ మిశ్రమాన్ని ఉడికించాలి. ఆతర్వాత సన్నని మంటపై 40 నిమిషాలు ఉడికించాలి. తర్వాత పొటాటో మాషర్‌ తీసుకుని దాన్ని మెత్తగా పేస్టులా చేయాలి. అందులో నెయ్యి వేసి కలపి, దానిపై నిమ్మరసం చల్లి వేడిగా తింటే ఎంతో బాగుంటుంది.

ఫిష్‌ హలీమ్‌

కావలసినవి: ముల్లు తీసిన చేపముక్కలు-అరకేజి, గోధుమరవ్వ- ఒక కప్పు (రాత్రి నీళ్లలో నానబెట్టాలి), శెనగపప్పు, పెసరపప్పు, ఎర్రకందిపప్పు, మినపప్పు-ఒక్కొక్కటీ ఒక్కో పావు కప్పు(వీటన్నింటినీ విడివిడిగా మూడు గంటలు నీళ్లలో నానబెట్టాలి) అల్లంపేస్టు-ఒక టేబుల్‌స్పూను, వెల్లుల్లిపేస్టు-3/4 టేబుల్‌స్పూను, పచ్చిమిర్చి-రెండు, తులసి ఆకు-ఒకటి, ఉల్లిపాయ-ఒకటి (సన్నగా తరిగి),పెరుగు-రెండు టేబుల్‌స్పూన్లు, ధనియాలపొడి-అర టేబుల్‌స్పూను, గరంమసాలాపొడి-ఒక టేబుల్‌స్పూను, నల్లమిరియాలపొడి-ఒక టేబుల్‌స్పూను, వేగించిన జీలకర్ర-పావు టేబుల్‌స్పూను, యాలకులు, లవంగాలు-ఒక్కొక్కటీ రెండేసి చొప్పున, దాల్చినచెక్క-చిన్నముక్క, ఉప్పు-రుచికి సరిపడా, నెయ్యి-అర కప్పు, నిమ్మరసం-రెండు టేబుల్‌స్పూన్లు. పైనఅలంకరణకు:నిమ్మ ముక్కలు, కొత్తిమీర- రెండు టేబుల్‌స్పూన్లు, వేగించిన జీడిపప్పులు-ఒక టేబుల్‌స్పూను (ఛాయిస్‌), వేగించిన ఉల్లిపాయముక్కలు-ఒక టేబుల్‌స్పూను, తాజా కొత్తిమీర ఆకులు- అర కప్పు, పుదీనా- పావు కప్పు.

తయారీ:

• అల్లం- వెల్లులి పేస్టు, ఉప్పు, కారం మిశ్రమాన్ని చేపముక్కలకు పట్టించి అరగంటపాటు నాననివ్వాలి.
• తర్వాత వాటిని నీటిలో ఉడికించాలి.
• ఉడికిన చేపముక్కలను చిన్న ముక్కలుగా కట్‌ చేయాలి.
• పచ్చిమిర్చి, కొత్తిమీర, పుదీనా ఆకులును మిక్సీలో వేసి పేస్టు చేయాలి.
• నీళ్లలో నానబెట్టిన శెనగపప్పు, పెసరపప్పు, మినపప్పులను కుక్కర్‌లో వేసి మెత్తగా ఉడికించాలి.
• చల్లారిన తర్వాత దీన్ని మెత్తటి పేస్టులా గ్రైండ్‌ చేయాలి.
• రాత్రంతా నానబెట్టిన గోధుమరవ్వను ప్రెషర్‌కుక్కర్‌లో మెత్తగా ఉడికించాలి.
• ఇందులో పెరుగుతోపాటు దాల్‌ పేస్టు, కొత్తిమీర, పుదీనా, పచ్చిమిర్చి పేస్టు, అల్లం పేస్టు, వెల్లుల్లి పేస్టు, నల్లమిరియాలపొడి, ధనియాలపొడి, జీలకర్ర పొడి, గరంమసాలా వేసి పేస్టులా చేయాలి.
• ఈ పేస్టులో చేపముక్కలతోపాటు రెండు కప్పుల నీళ్లు పోసి బాగా కలపాలి. వాటిని సన్నని మంటపై ఉంచి మధ్య మధ్యలో కదుపుతూ అరగంటపాటు ఉడకనిచ్చి ఉప్పు చల్లాలి.
• పెద్ద కడాయిలో నెయ్యి వేసి తులసి ఆకు, దాల్చినచెక్క, లవంగాలు, యాలకులు అందులో వేసి వేగించాలి.
• సువాసన రావడం మొదలవ్వగానే కిందికి దించి వేగించిన ఉల్లిపాయముక్కలను ఫిష్‌ హలీమ్‌పై చల్లాలి.
• పైన కొత్తిమీర తరుగు గార్నిష్‌లా చేసి, కొద్దిగా నిమ్మరసం చల్లి సర్వ్‌ చేయాలి.

మటన్‌ హలీమ్‌

కావలసినవి: బోన్‌లెస్‌ మటన్‌-250 గ్రాములు, అల్లం-వెల్లుల్లిముద్ద- టేబుల్‌స్పూను, ఉప్పు-తగినంత, పచ్చిమిర్చి- సరిపడా, గోధుమరవ్వ- కొద్దిగా, మిరియాలు- కొన్ని, గరంమసాలా-అర టీస్పూను, వేగించిన ఉల్లిపాయముక్కలు- ఒకటిన్నర కప్పు, సాజీరా-ఒక స్పూను, పుదీనా-ఒక కట్ట, నూనె- టేబుల్‌స్పూను, నెయ్యి-పావు కప్పు, ధనియాలపొడి- ఒక స్పూను, నిమ్మరసం-టేబుల్‌స్పూను, నీళ్లు-సరిపడా.

తయారీ:

• మటన్‌ని నీటిలో శుభ్రంగా కడగాలి.
• గోధుమరవ్వను అరగంటసేపు నీళ్లలో నానబెట్టాలి.
• కుక్కర్‌లో నూనె వేడిచేయాలి.
• వేడెక్కిన నూనెలో మటన్‌, మిరియాలు, అల్లంవెల్లుల్లిముద్ద, సాజీరా, గరంమసాలా, ధనియాలపొడి, రుచికి సరిపడా ఉప్పు వేసి, నీళ్లు పోసి కుక్కర్‌ మూత పెట్టాలి.
• ఆరు విజిల్స్‌ వచ్చాక స్టవ్‌ ఆపేయాలి.
• ఆవిరిపోయాక ఉడికిన మటన్‌ని మిక్సీలో వేసి మెత్తగా గ్రైండ్‌ చేయాలి.
• కడాయిలో గోధుమరవ్వ, తగినన్ని నీళ్లు పోసి ఉడికించాలి.
• రవ్వ ఉడికాక స్టవ్‌ ఆపేయాలి.
• మరో కడాయిలో నెయ్యి కరిగించాలి.
• అందులో ఉడికిన గోధుమరవ్వ, మటన్‌లను వేయాలి.
• మిశ్రమం ముద్దలా అయ్యాక వేగించిన ఉల్లిపాయముక్కలు, పుదీనా, నిమ్మరసం పైన చల్లి కిందికి దించాలి.

వెజ్‌ హలీమ్‌

కావలసినవి: గోధుమరవ్వ-అరకప్పు, ఓట్స్‌- రెండు టేబుల్‌స్పూన్లు, ఎర్రకందిపప్పు, పెసరపప్పు, మినపప్పు, నువ్వులు- ఒక్కొక్కటీ ఒక్కో టేబుల్‌స్పూను, మిరియాలు-పావు టీస్పూను, యాలకులు-మూడు, లవంగాలు-నాలుగు, దాల్చినచెక్క-చిన్నముక్కలు రెండు, జీలకర్ర-ఒక టీస్పూను, సోయా వాటర్‌ గ్రాన్యూల్స్‌-పావు కప్పు (నీళ్లల్లో పదినిమిషాలు నాననిచ్చి), బాదంపప్పులు, జీడిపప్పు- ఒక్కొక్కటీ ఒక్కో టేబుల్‌స్పూను, ఉల్లిపాయలు- రెండు (సన్నటి ముక్కలుగా తరిగి), మిక్స్‌డ్‌ వెజిటబుల్స్‌-అరకప్పు(క్యారెట్‌, బీన్స్‌, పచ్చిబటాణీ గింజలు, గ్రీన్‌ బీన్స్‌, లిమా బీన్స్‌ లాంటివి), పాలు-అర కప్పు, పచ్చిమిర్చి-మూడు (నిలువుగా కట్‌ చేసి), పుదీనా, కొత్తిమీర - ఒక్కొక్కటీ ఒక్కో అర కప్పు (తరుగు), ఉప్పు- రుచికి సరిపడా, నిమ్మకాయముక్కలు- అలంకరణకు.

తయారీ:

• గోధుమరవ్వ నుంచి జీరా వరకూ పైన చెప్పిన అన్ని పదార్థాలనూ పొడిగా గ్రైండ్‌ చేయాలి. ఈ పొడి ఒక కప్పు ఉంటుంది.
• పాన్‌ తీసుకుని రెండు టేబుల్‌స్పూన్ల నూనె అందులో వేయాలి. వేడెక్కిన నూనెలో తరిగిపెట్టుకున్న ఉల్లిపాయముక్కల్ని వేసి బ్రౌన్‌ రంగులో వచ్చేవరకూ వేగించి ఒక ప్లేటులో పోయాలి.
• ప్రెషర్‌ కుక్కర్‌లో రెండు టేబుల్‌స్పూన్ల నెయ్యి లేదా నూనె వేసి అందులో జీడిపప్పును బంగారు వర్ణంలోకి వచ్చేదాకా వేగించాలి. తర్వాత పచ్చిమిర్చి ముక్కలు కూడా వే సి వేగించాలి.
• ఇందులో వేగించిన ఉల్లిపాయలను (అలంకరణకు కొద్దిగా విడిగా తీసి) కూడా కలిపి రెండు నిమిషాలు ఉడికించాలి.
• మిక్స్‌డ్‌ వెజిటబుల్స్‌ కూడా ఇందులో వేసి రెండు నిమిషాలు ఉడికించాలి.
• నానబెట్టిన సోయా గింజల్లోని నీళ్లను తీసేసి ప్రెషర్‌కుక్కర్‌లో వేసి ఒక నిమిషం ఉడకనివ్వాలి.
• అందులో పాలు కూడా ఉడకనివ్వాలి.
• తర్వాత మూడు కప్పుల నీళ్లు అందులో పోసి పుదీనా, కొత్తిమీర తరుగు వేయాలి. రెడీ చేసి పెట్టుకున్న పొడిని, రుచికి సరిపడా ఉప్పును కూడా ఇందులో వేసి ఉండ కట్టకుండా కలపాలి. ఈ మిశ్రమం మరుగుకు వచ్చేదాకా ఉంచి కుక్కర్‌పై మూతపెట్టి 15 నిమిషాలు సన్నని మంటపై ఉడికించాలి.
• ఆవిరి తగ్గిన తర్వాత కుక్కర్‌ మూత తీసి అందులోని మిశ్రమాన్ని మాషర్‌తో మెత్తగా చేయాలి.
• ఇలా రెడీ అయిన వెజ్‌ హలీమ్‌పై పుదీనా, కొత్తిమీర తరుగు, నిమ్మకాయముక్కలు, వేగించిన నట్స్‌లతో అలంకరించి సర్వ్‌ చేయాలి.