నవరాత్రి నైవేద్యాలు అలంకారాలు | Navaratri Naivedyalu Alankaralu navaratri naivedyam in telugu, navratri naivedyam for 9 days in telugu, navratri prasadam 9 days in vijayawada navratri prasadam recipes, devi navaratri alankaram and prasadam 2018, navratri naivedyam in telugu, navratri bhog for 9 days, navratri naivedyam in telugu books

online telugu books store

www.Devullu.com

వ.సం	శ్రీ అమ్మవారి దివ్య అలంకరములు	చీర రంగు
ది:26-9-2022	శ్రీ స్వర్ణకవచదుర్గాదుర్గాదేవి	స్వర్ణ కవచం
ది:27-9-2022	శ్రీ బాలా త్రిపుర సుందరీ దేవి	లేత పింక్ రంగు చీర
ది:28-9-2022	శ్రీ గాయత్రి దేవి	ఆరెంజ్ కలర్ చీర
ది:29-9-2022	శ్రీ లలిత త్రిపుర సుందరి దేవి	ప్యూర్ గోల్డ్ జరీ
ది30-9-2022	శ్రీ అన్నపూర్ణా దేవి	గంధపు పసుపు రంగు చీర
ది:1-10-2022	శ్రీ మహాలక్ష్మిదేవి	పింక్ (నిండు) చీర
ది2-10-2022	శ్రీ సరస్వతీ దేవి(మూలానక్షత్రం)	తెలుపు రంగు చీర
ది:3-10-2022	శ్రీ దుర్గా దేవి	నిండు ఎరుపు రంగు చీర
4-10-2022	శ్రీ మహిషాసురమర్ధినీ దేవి	బ్రౌన్ / ఎరుపు కలనేత జరీ చీర
ది:5-10-2022	శ్రీ రాజరాజేశ్వరి దేవి	పచ్చ రంగు చీర

ఆదిశక్తికి ఆరగింపు

దసరా వేడుక, ఆ జగన్మాతను 9 రూపాల్లో పూజించుకునే శుభసందర్భం ఇది. మరి ఆ అలంకారాలకు తగినట్లుగా నైవేద్యాలూ ఉండాలి కాబట్టి.. అవేంటో చూసేద్దాం.

చక్కెర పొంగలి

కావల్సినవి: బియ్యం- ముప్పావుకప్పు, పెసరపప్పు- పావుకప్పు, ఎండు కొబ్బరి ముక్కలు, జీడిపప్పు - పావుకప్పు చొప్పున, కిస్‌మిస్‌- పదిహేను, బెల్లం- అరకప్పు, చక్కెర- ముప్పావుకప్పు, యాలకులు- నాలుగు, పచ్చ కర్పూరం, - చిటికెడు, నెయ్యి- అరకప్పు.

తయారీ: బాణలిని పొయ్యిమీద పెట్టి పెసరపప్పును వేయించాలి. పచ్చివాసన పోయాక దింపేయాలి. అదే బాణలిలో రెండు చెంచాల నెయ్యి కరిగించి జీడిపప్పు, కిస్‌మిస్‌, కొబ్బరి ముక్కల్ని విడివిడిగా వేయించుకుని తీసుకోవాలి. కుక్కర్‌లో బియ్యం, వేయించిన పెసరపప్పూ, రెండున్నర కప్పుల నీళ్లు తీసుకుని పొయ్యి మీద పెట్టాలి. మూడు కూతలు వచ్చాక దింపేయాలి. ఓ గిన్నెలో బెల్లం, చక్కెర, అరకప్పు నీళ్లు తీసుకుని పొయ్యిమీద పెట్టాలి. ఈ రెండూ కరిగి లేతపాకంలా అయ్యాక దింపేయాలి. ఈ పాకాన్ని వడకట్టి ఉడికించి పెట్టుకున్న అన్నంలో వేసి మళ్లీ పొయ్యి మీద పెట్టాలి. అందులో ముందుగా వేయించిన పెట్టుకున్న కొబ్బరిముక్కలూ, జీడిపప్పూ, కిస్‌మిస్‌, యాలకులపొడీ, పచ్చకర్పూరం, మిగిలిన నెయ్యి వేసేయాలి. మంట తగ్గించి మధ్యమధ్య కలుపుతూ ఉంటే కాసేపటికి నెయ్యి పైకి తేలుతుంది. అప్పుడు దింపేయాలి.

అప్పాలు

కావల్సినవి: బియ్యప్పిండి- ముప్పావుకప్పు, గోధుమపిండి- పావు కప్పు, బెల్లం- కప్పు, నీళ్లు- కప్పు, నూనె- వేయించేందుకు సరిపడా.

తయారీ: ఓ గిన్నెలో నీళ్లూ, బెల్లం తరుగు తీసుకుని పొయ్యిమీద పెట్టాలి. బెల్లం కరిగి లేత పాకం వచ్చాక బియ్యప్పిండీ, గోధుమ పిండి వేసుకుంటూ ఉండలు కట్టకుండా కలిపి దింపేయాలి. ఇది చల్లారేలోగా బాణలిలో వేయించేందుకు సరిపడా నూనె వేడిచేయాలి. బియ్యప్పిండి ముద్దను కొద్దిగా తీసుకుని నూనెరాసిన ప్లాస్టిక్‌కవరుపై ఉంచి.. బిళ్లలా అద్దుకుని కాగుతోన్న నూనెలో వేసి వేయించుకోవాలి. ఇలాగే మిగిలిన పిండినీ చేసుకుంటే చాలు. అప్పాలు సిద్ధమైనట్లే.

చిట్టిగారెలు

కావల్సినవి: మినప్పప్పు- చిన్నగ్లాసు(నాలుగైదు గంటల ముందు నానబెట్టుకోవాలి), బియ్యప్పిండి- మూడు గ్లాసులు(నాలుగైదు గంటల ముందు బియ్యాన్ని నానబెట్టి పిండి పట్టించాలి),ఉప్పు- కొద్దిగా, నూనె- వేయించడానికి సరిపడా.

తయారీ: మినప్పప్పును గారెల పిండిలా రుబ్బుకోవాలి. అందులో బియ్యప్పిండి, తగినంత ఉప్పు కలపాలి. ఈ పిండిని చిన్న ఉండలుగా చేసుకుని తడివస్త్రంపై ఐదారు వేయాలి. వాటిపై మరో తడి వస్త్రాన్ని కప్పి గ్లాసు లేదా కప్పుతో నొక్కినట్టు చేయాలి. ఇలా చేసుకున్న వాటన్నింటినీ కాగుతోన్న నూనెలో వేసి వేయించి తీసుకోవాలి. ఇలాగే మిగిలిన పిండినీ చేసుకోవాలి.

దద్ద్యోదనం

కావల్సినవి: మెత్తగా వండిన అన్నం- ముప్పావు కప్పు, పెరుగు - కప్పు, పాలు- రెండు టేబుల్‌స్పూన్లు, అల్లం తరుగు- రెండు చెంచాలు, పచ్చిమిర్చి- ఐదు, కరివేపాకు- రెండు రెబ్బలు, జీలకర్ర- అరచెంచా, సెనగపప్పు- రెండు చెంచాలు, మినప్పప్పు- రెండు చెంచాలు, ఆవాలు- చెంచా, ఎండుమిర్చి- రెండు, మిరియాలు- కొన్ని, ఉప్పు- తగినంత, నెయ్యి - రెండు చెంచాలు, కొత్తిమీర తరుగు - రెండు చెంచాలు.

తయారీ: అన్నంలో పెరుగు, తగినంత ఉప్పూ, పాలు వేసుకుని బాగా కలిపి పెట్టుకోవాలి. బాణలిలో నెయ్యి వేసి పొయ్యిమీద పెట్టుకోవాలి. అది కరిగాక ఎండుమిర్చి, మినప్పప్పు, సెనగపప్పు, జీలకర్రా, ఆవాలు, మిరియాలూ, కరివేపాకు వేయాలి. అవన్నీ వేగాక అల్లం తరుగు, పచ్చిమిర్చి వేయించి రెండు నిమిషాలయ్యాక దింపేయాలి ఈ తాలింపునూ, కొత్తిమీర తరుగునూ అన్నంలో వేసి బాగా కలిపితే సరిపోతుంది.

కదంబం

కావల్సినవి: బియ్యం- కప్పు, కందిపప్పు- కప్పు, చింతపండు గుజ్జు- చెంచా, బంగాళాదుంప, చిలగడదుంప, చేమదుంప, గుమ్మడికాయ, ములక్కాడ ముక్కలు - అన్నీ కలిపి మూడు కప్పులు, సాంబారు పొడి- చెంచా, ఉప్పు - రుచికి తగినంత, కరివేపాకు- రెండు రెబ్బలు, కొత్తిమీర - కొద్దిగా, నువ్వుల నూనె- కొద్దిగా.

తయారీ: బియ్యం, కందిపప్పును విడివిడిగా ఉడికించి తీసుకోవాలి. మరో గిన్నెలో కూరగాయ ముక్కలు ఉడికించుకోవాలి. ఇప్పుడు బాణలినిపొయ్యిమీద పెట్టి కాసిని నీళ్లు పోయాలి. అందులో చింతపండుగుజ్జు, సాంబారు పొడి, కరివేపాకూ, ఉప్పూ, కూరగాయముక్కలు వేయాలి. అవి కాసేపు ఉడికాక ఉడికించి పెట్టుకున్న పప్పూ, అన్నం వేసి సన్నని మంటపై ఉంచాలి. ఈ అన్నం దగ్గరకు అయ్యాక కొత్తిమీర, నువ్వులనూనె వేసి దింపేయాలి.

గూడాన్నం

కావల్సినవి: బియ్యం - అరకప్పు, బెల్లం తరుగు - కప్పు, జీడిపప్పు- ఐదారు, ఎండు ద్రాక్ష- మూడు చెంచాలు, యాలకుల పొడి- పావుచెంచా, నెయ్యి- పావు కప్పు.

తయారీ: ముందుగా బియ్యం కడిగి అన్నంలా వండి పెట్టుకోవాలి. అడుగు మందంగా ఉన్న గిన్నెలో పావుకప్పు నీళ్లు పోసి పొయ్యి మీద పెట్టుకోవాలి. అవి వేడయ్యాక బెల్లం తరుగు వేయాలి. బెల్లం కరిగి లేత పాకంలా అవుతున్నప్పుడు అందులో అన్నం వేసి మంట తగ్గించేయాలి. కాసేపటికి అన్నం దగ్గరకు అవుతుంది. అప్పుడు యాలకులపొడీ, నేతిలో వేయించిన జీడిపప్పూ, ఎండుద్రాక్ష పలుకుల్ని అన్నంలో వేసి కలపాలి. రెండు నిమిషాలయ్యాక దింపేస్తే చాలు.

నువ్వుల అన్నం

కావల్సినవి: అన్నం- రెండు కప్పులు, నవ్వులు- నాలుగు చెంచాలు, ఎండుమిర్చి- ఐదు, ఇంగువ- చిటికెడు, సెనగపప్పు- చెంచా, నువ్వుల నూనె- ఐదు చెంచాలు, ఉప్పు- తగినంత

తయారీ: ముందుగా బాణలిని పొయ్యి మీద పెట్టి నూనె లేకుండా నువ్వుల్ని వేయించి తీసి పెట్టుకోవాలి. అదే బాణలిలో మరో చెంచా నూనె వేడిచేసి ఎండుమిర్చీ, సెనగపప్పూ, ఇంగువ వేయించి దింపేయాలి. ఈ తాలింపులో తగినంత ఉప్పూ, వేయించిన నువ్వులూ కలిపి మరీ మెత్తగా కాకుండా పొడిలా చేసుకుని తీసుకోవాలి. బాణలిలో మిగిలిన నూనె వేడిచేసి అన్నం, చేసుకున్న నువ్వులపొడీ వేసుకుని రెండింటినీ బాగా కలిపితే చాలు.

పులిహోర

కావల్సినవి: అన్నం- కప్పు, నూనె- నాలుగు చెంచాలు, ఆవాలు- అరచెంచా, ఎండుమిర్చి- ఒకటి, జీలకర్ర- అరచెంచా, కరివేపాకు- నాలుగు రెబ్బలు, సెనగపప్పు- అరచెంచా, పల్లీలు- గుప్పెడు, మినప్పుప్పు- అరచెంచా, ఉప్పు- తగినంత, ఇంగువ- చిటికెడు, చింతపండు గుజ్జు- నాలుగు చెంచాలు, పచ్చిమిర్చి- మూడు, పసుపు- కొద్దిగా, బెల్లం- చిన్నముక్క.

తయారీ: ముందుగా బాణలిలో నూనె వేసి పొయ్యి మీద పెట్టాలి. అది వేడయ్యాక సెనగపప్పు, ఆవాలూ, మినప్పప్పు, ఎండుమిర్చి, పచ్చిమిర్చి ముక్కలూ, జీలకర్ర, కరివేపాకు వేయాలి. రెండునిమిషాలాగి పల్లీలు చేర్చాలి. ఇవన్నీ వేగాక పసుపు, ఇంగువ, చింతపండు గుజ్జు, బెల్లం, తగినంత ఉప్పు వేయాలి. కాసేపటికి అన్నీ వేగి నూనె పైకి తేలుతుంది. అప్పుడు దింపేయాలి. ఈ తాలింపు కొద్దిగా చల్లారాక అన్నంలో వేసి బాగా కలిపితే పులిహోర సిద్ధమయినట్టే.

పాయసాన్నం

కావల్సినవి: బియ్యం- అరకప్పు, చక్కెర - ముప్పావుకప్పు, నెయ్యి- మూడు టేబుల్‌ స్పూన్లు, పాలు- రెండుకప్పులు, జీడిపప్పు- మూడు చెంచాలు.

తయారీ: కుక్కర్‌లో కడిగిన బియ్యం, ఒకటిన్నర కప్పు పాలు, కాస్త నెయ్యి వేసి పొయ్యిమీద పెట్టాలి. మూడు కూతలు వచ్చాక దింపేయాలి. ఈ అన్నాన్ని మళ్లీ పొయ్యిమీద పెట్టి మిగిలిన పాలూ, చక్కెర వేయాలి. చక్కెర కరిగి కాస్త పల్చగా అయ్యేవరకూ మంట తగ్గించి మధ్యమధ్య కలుపుతూ ఉండాలి. ఇంతలో ఓ బాణలిలో మిగిలిన నెయ్యి తీసుకుని పొయ్యిమీద పెట్టాలి. అది కరిగాక జీడిపప్పు వేయించి పొయ్యి కట్టేయాలి. పాలు కాస్త ఆవిరవుతున్నప్పుడు జీడిపప్పూ, నెయ్యిని అందులో వేసి దింపేయాలి.

శాకాన్నం

కావల్సినవి: అన్నం - కప్పు, క్యారెట్‌, బీన్స్‌ ముక్కలు - రెండూ కలిపి పావుకప్పు, పచ్చిబఠాణీ - రెండు చెంచాలు, క్యాప్సికం, వంకాయ, బంగాళాదుంప - ఒక్కోటి చొప్పున, బెండకాయలు - రెండు, చిక్కుడుకాయలు - రెండు, జాజికాయపొడి - అరచెంచా, జాపత్రి పొడి - పావుచెంచా, యాలకులు - మూడు, లవంగాలు - నాలుగు, దాల్చిన చెక్క - చిన్న ముక్క, నెయ్యి - పావుకప్పు, ఉప్పు - తగినంత, కరివేపాకు రెబ్బలు - రెండు.

తయారీ: కూరగాయ ముక్కలన్నింటినీ ఓ గిన్నెలోకి తీసుకుని అవి మునిగేలా నీళ్లు పోసి పొయ్యిమీద పెట్టాలి. అవి మరీ మెత్తగా కాకుండా ఉడికించి తీసుకోవాలి. ఇప్పుడు పొయ్యిమీద గిన్నెపెట్టి నెయ్యి కరిగించాలి. అందులో జాజికాయపొడి, జాపత్రిపొడి, యాలకులూ, లవంగాలూ, దాల్చినచెక్కపొడీ వేసి వేయించుకోవాలి. నిమిషమయ్యాక కూరగాయముక్కలన్నింటినీ వేసేయాలి. అవి వేగాక కరివేపాకు, అన్నం, తగినంత ఉప్పు వేసి బాగా వేయించుకుని తీసుకుంటే చాలు.

కట్టె పొంగలి

కావల్సినవి: బియ్యం- అరకప్పు, పెసరపప్పు- పావు కప్పు, నీళ్లు- రెండు కప్పులు, ఉప్పు- తగినంత.

తాలింపు కోసం: నెయ్యి- మూడు చెంచాలు, జీలకర్ర- చెంచా, మిరియాలు- చెంచా, అల్లం - చిన్న ముక్క, కరివేపాకు- నాలుగు రెబ్బలు, జీడిపప్పులు- పది. 

తయారీ: బియ్యం, పెసరపప్పును కడిగి కుక్కర్‌లో తీసుకుని నీళ్లు పోయాలి. మూడు కూతలు వచ్చేవరకూ ఉడికించుకుని తీసుకోవాలి. ఇప్పుడు బాణలిని పొయ్యిమీద పెట్టి నెయ్యి వేయాలి. అది కరిగాక జీడిపప్పు వేయించాలి. అవి కాస్త ఎర్రగా వేగాక జీలకర్రా, మిరియాలపొడీ, కరివేపాకూ, అల్లం తరుగు వేయాలి. అవి కూడా వేగాక బాణలి దించేయాలి. ఈ తాలింపూ, సరిపడా ఉప్పు ముందుగా ఉడికించి పెట్టుకున్న అన్నంలో వేసి కలపాలి. ఈ పొంగలిని మరోసారి పొయ్యిమీద పెట్టి రెండు నిమిషాలయ్యాక దింపేయాలి---శ్రీమతి విష్ణుభొట్ల పద్మావతి 

- శ్రీదుర్గామల్లేశ్వరస్వామివార్ల దేవస్థానం సహకారంతో, ఇంద్రకీలాద్రి, విజయవాడ